Poet: Mohsin Naqvi
اِک بھکارن
شہر کے مصروف چوراہے کی اندھی بھیڑ میں
اپنے فاقوں سے اَٹی خواہش کی ضد پر
بیچنے آئی ہے
اپنی نوجوانی کا غُرور
توڑنے آئی ہے بے صُورت اَنا کے آیئنے
بے حنا ہاتھوں میں پھیلائے ہوئے
بس چند لمحے زندہ رہنے کا سوال
چند لمحے جن کا ماضی ہے نہ حال
آنکھ میں بجھتی ہوئی اِک موجِ نُور
تن پہ لپٹے چیتھڑوں کی سِلوٹوں میں
سانس لیتے واہمے
دَم توڑتا احساس ، لَو دیتا شُعور
زندگی کے دو کنارے۔۔۔۔۔چار سُو
اک طرف ہنگامئہ ہوس۔۔۔اِک سَمت ہُو
کس قدر مہنگی ہیں، باسی روٹیاں
کتنی سستی ہے ، متاعِ آبرو
اے خُدائے ، کاخ و کُو
No comments:
Post a Comment