Love / Romantic Poetry - قریب آجاؤ

Poet: Ahmad Faraz

سکوتِ شامِ خزاں ہے قریب آجاؤ
بڑا اُداس سماں ہے قریب آجاؤ

نہ تم کو خود پہ بھروسہ نہ ہم کو زعمِ وفا
نہ اعتبارِ جہاں ہے قریب آجاؤ

رہِ طلب میں کسی کو کسی کا دھیان نہیں
ہجومِ ہم سفراں ہے قریب آجاؤ

جو دشتِ عشق میں بچھڑے وہ عمر بھر نہ ملے
یہاں دُھواں ہی دُھواں ہے قریب آجاؤ

یہ آندھیاں ہیں تو شہرِ وفا کی خیر نہیں
زمانہ خاک فشاں ہے قریب آجاؤ

فقیہہ شہر کی مجلس نہیں دُور رہو
یہ بزمِ پیر مغاں ہے قریب آجاؤ

فراز دُور کے سُورج غروب سمجھے گئے
یہ دَورِ کم نظراں ہے قریب آجاؤ