Poet: Mohammad Yamin Iraqi
اس حقیقت تک پہنچنا ہے بہ فیضانِ خیال
آگہی کے کتنے در رکھتا ہے ایوانِ خیال
علم کے گہرے سمندر میں اترلے زیست پھر
خود بخود کھل جائیں گے کتنے دبستانِ خیال
مدتوں ادراک سرگرداں رہا اس کھوج میں
کس کلیدِ علم سے کھلتا ہے زندانِ خیال
ڈوب جاتے ہیں کبھی روشن ستارےفکر کے
چھوٹ جاتا ہے کبھی ہاتھوں سے دامانَ خیال
سرحدِ ادراک سے آگے بھی ہیں کتنے مقام
کس طرف جاتے ہیں دیکھیں اب غزالانِ خیال
زندگی آماجگاہِ نغمہ و آہنگ ہو
آؤ ہم مل کر سجالیں پھر گلستانِ خیال
دیکھنا یامین کیا اپنے جلو میں لائے ہیں
فکر عرفانِ تخیل علم رضوانِ خیال
No comments:
Post a Comment