Poet: Ghafil Karnali
سناں کی نوک پہ قرآن سنانے آئے ہیں
حسین عظمت انسان دکھانے آئے ہیں
خدا کا نام دو عالم میں سر بلند رہے
خدا کے نام پہ گھر کو لٹانے آئے ہیں
جلا کے دشت ستم میں چراغ خون جگر
تمام ظلمت باطل مٹانے آئے ہیں
یزیدیت کا فسوں خاک میں ملا ڈالا
علی کا زور یقین آزمانے آئے ہیں
تیرا نصیب ہے اے دشت کربلا کہ تجھے
حسین جنت ایمان بنانے آئے ہیں
خدا کا دین رہے اور جاں چلی جائے
وہ کربلا میں یہی تو بتانے آئے ہیں
سجی ہوئی ہے شہادت کی انجمن غافل
غم حسین ہے غم کے زمانے آئے ہیں
No comments:
Post a Comment