Chalo Aik Deal Karte Hain - Love / Romantic Poetry

Muhabbat DEAL Say Maawara Rishta
Sahi
Phir Bhi
Chalo Ek DEAL Kertay Hain
Yeh Saraa Aasman Lay Lo
Mujhe Bas Woh Sitara Do
Tumharay Naam Say Jo Aasman Per Jhilmilata Hay
Mujhe In Guftugu Kerti Huee Aankhaun Say Kiya Lena
Mujhe Woh Ankahee Day Do
Jisay Sun Nay Ki Hasrat Main Hawaa Thamm Thumm Kay Chalti Hay
Tumharay Reshmi Malboos Main Perti Huee Silwatt
Tumharay Qurb Ki Dheemi Sulagtee Aanch Si Garmee
Tumharay Paaon Ki Aahat
Jo Tappti Dopaher Ko Sham Main Tabdeel Kerti Hay
Tumharay Paas Say Uth'ti Huee Khushbu
Mujhe In Sab Say Kiya Lenaa
Tum Apnay Paas Hi Rakho
Mager In Sab Kay Badlay Main
Mujhe Is Bay Yaqeeni Say Rehaayee Do
Tou Acha Hay
Hawaa Kay Daush Per Rakhay Diyay Jaisay
Meray Bujhtay Huay Dil Ko
Mujhe Yun Nauk-E-Khanjer Per
Kahan Tak Raqss Kerna Hay
Koi Mayaaad Hi Day Do
Mujhe Tum Say Koi Shikwaa Nahin Hogaa
Bhalay Tum Do Jahan Lay Lo
Mujhe Is Bay Yaqeeni Say Rehaayee Do Tou Acha Hay
Mohabbat DEAL Say Ek Mawara Rishta Sahi
Phir Bhi
Chalo Yeh "Deal' Kertay Hain