Tabah Kaariyan Sailaab Ki, Maaz-Allah
Hazaroun Bastian , Doobi Hui Hein Paani Mein
Hazaroun Log, Khulay Aasman Ke Nichay
Talaash-E-Rizq Mein, Bethay Huay Hein, Muhr Ba Lab
Nahi Hai In Ka Sahara, Koi Khuda Ke Siwa
Bilak Rhay Hain, Kaheen Doodh Ke Liye Bachay
Na Janay Kitni Bahu, Betoun Ke Sir Ki Rida
Sawaal Krti Hai, Arbaab-E-Iqtadaar Se Ye
Rahein Gay Bay Sar-O-Saaman, Hum Yahan Kb Tk
Na Jaanay Kitnay Jigar Goshay, Zairay Aab Huay
Na Jaanay Kitni Bahaarein, Khizaan Ki Zad Mein Hein
Hein Maaein Nuhay Kina, Apni Bay Sabaati Pr
Hr Aik Baap Ke Chehray Pe, Salwatein Gum Ki
Bta Rahi Hein Ke Aasudgi, Naseeb Nahi
Na Jaanay Kitnay Gharon Ko, Nigal Gaya Pani
Jo Log Jhail Rhay Hein, Azaab E Darbadri
Na Jaanay Kb Inhein, Sabar W Qaraar Aaye Ga
Taras Rhay Hein, Khilono Ko, Phool Se Bachay
Nahi Hai Koi Bhi Aisa Jo In Ke Dukh Ko Samjhay
Woh Madarsay Bhi, Zamee Boos Hogye, Jin Mein
Jalaaye Jaatay Thay, Ilam Aur Aagahi Ke Chiraag
Hr Ik Khaimay Se Nuhoon Ki Aa Rahi Hai Sadaa
Yeh Karbalaa Ke Manazir Nahi Tou Phir Kya Hai
Jidhar Bhi Dekhiye, Paani Ki Hukumrani Hai
Hawaa Ke Dosh Pe, Insaan Ki Zindagani Hai
Aye Meray Hum Watno, In Ki Dilbari Ke Liye
Karo, Woh Kaam, Jo Tum Ko Bhi Zindagi Bakshay
Tumharay Qalab W Nazar Ko Bhi Roshani Bakshay
No comments:
Post a Comment